Marian Dove, Fly!

“Marian Dove, Fly!”

“Hindi nagtagal at si Maria’y nagmamadaling pumunta

sa isang bayan sa kaburulan ng Juda.

Pagdating sa bahay ni Zacarias,

binati niya si Elisabet…

Napuspos ng Espiritu Santo si Elisabet,

at buong galak na sinabi,

‘Pinagpala ka sa mga babae,

at pinagpala rin ang dinadala mo sa iyong sinapupunan!

Sino ako upang dalawin ng ina ng aking Panginoon…

Mapalad ka sapagkat nanalig kang matutupad

ang ipinasasabi sa iyo ng Panginoon!’” (Lucas 1: 39-45).

Sight-seeing o pagninilay…

Vacacion grande o spiritual repose…

Gimmick o pagdiriwang…

Pagsasarili o pag-iisa…

Unahan o ugnayan…

Pagtatanghal o pagbabahagi…

Pagtalikod o pag-aalaala…

Turista o pilgrim…

Ano ang pagkakaiba?

Turista… dala ay kamera…

Pilgrim… dala ay Pananampalataya.

Turista… dala ay kamera para kumuha ng ala-ala…

Pilgrim… dala ay Pananampalataya.

upang mag-iwan ng ala-ala.

Kaya’t ang “sight-seeing” -

ang paghanga sa kagandahan ng sangnilikha

ay nagwawakas sa pagninilay

sa kabutihan at kagandahan ng Dakilang Lumikha;

Ang bakasyonista ay nagiging isang manlalakbay

na naghahanap ng kapahingahan

para sa pagal na katawan at kaluluwa;

Ang inaakalang isang “gimmick” lamang

ay naging isang masayang pagdiriwang ng buhay.

Ang pag-iisa ay hindi pagsasarili

kundi pag-akap sa katahimikan

upang itaas ang puso at isipan sa Panginoon

na magdadala sa isang mas malalim na ugnayan

sa Kanya at sa isa’t-isa;

At anumang kabutihan ang aking gagawin,

ito’y hindi isang pagtatanghal

kundi isang pagbabahagi

ng anumang biyayang sa aki’y ipinagkaloob.

Ang pilgrim ay hindi tumatalikod sa nakaraan,

manapa’y inaalaala ang lumipas

upang gawing ganap ang kasalukuyan

at puno ng pag-asang hinihintay ang isang bagong bukas.

Ito ang “Marian Dove ,Fly”…

Isang Lakbay-dalangin.

Kasama ni Maria,

Ako ay Pilgrim… Ikaw ay Pilgrim…

Siya ay Pilgrim… Tayo’y mga Pilgrim!!!

Oo, mga Manlalakbay…

Manlalakbay na nananalangin…

na naghahanap kay Hesus!

Manlalakbay na nagdadala kay Hesus sa kapwa,

at ng handog niyang Kapayapaan!

“Marian Dove ,Fly”…

Buhay at nagbibigay-buhay

na Pananampalataya… Pag-asa… Pag-ibig!

“Marian Dove ,Fly”…

Pagtanaw sa Kaharian ng Ama,

ang “Walang hanggang Kaharian ng Kapayapaan”

na inihanda ni Hesus para sa atin.

Sa ating “Marian Dove ,Fly”, dadalhin tayo

ng Mahal na Birhen ng EDSA, Reyna ng Kapayapaan,

unang-una, kay Hesus, The Marian Dove,

na isa ring Manlalakbay!

Sa kanyang lakbay-dalangin

dala niya ang Kaharian ng Ama.

Sa kanyang pagbabalik sa Ama siya ay nag-iwan ng alaala –

ang Banal na Eukaristiya –

alaala ng kanyang pananahan sa piling natin.

Ito ang kanyang habilin sa atin:

“Gawin ninyo ito sa pag-aalaala sa akin”.

Pag-aalaala na nagpapatibay ng Pananampalataya.

Pag-aalaala na nagbibigay ng Pag-asa.

Pag-aalaala na nagtuturo at nag-aakay sa atin

sa kaganapan ng Pag-ibig.

Sa ating “Marian Dove ,Fly”, dadalhin tayo

sa iba’t-ibang Parokya ng Arkidiyosesis ng Maynila

at mga Diyosesis at Arkidiyosesis ng bansa.

Nawa’y makita at maiwan natin sa puso at ala-ala

ng mga taong ating makaka-ugnay

• Ang Marian Dove,

si Hesus, Prinsipe ng Kapayapaan;

• Ang Marian Dove,

si Hesus, ang Diyos na nasa ating piling –

sa kagandahan ng kanyang mga likha,

sa yaman ng ating kasaysayan at kultura,

sa taong nilikhang kawangis at kalarawan Niya.

• Ang Marian Dove,

matibay na Pananampalataya,

buhay na Pag- asa

at wagas Pag-ibig;

• Ang Marian Dove,

ang Kapayapaan na nakapananahan lamang

sa puso ng mga aba, mga dukha, mga bata,

at sa mga taong may pusong tulad nang sa bata.

• Ang Marian Dove,

ang pamimintuho kay Maria, Reyna ng Kapayapan

at pagpapalaganap ng Panalangin Para Sa Kapayapaan.

Maligayang Paglalakbay Sa Inyong Lahat!!!

Marian Dove, Fly!

By: Rev. Fr. Lari Abaco